Mekylin Engelbrecht se debuut digbundel bekendgestel

Mekylin Engelbrecht, 'n 20-jarige regstudent, het Saterdag haar eerste boekbekendstelling by die Malmesbury Museum gehou. 

Die geleentheid het die bekendstelling van haar digbundel, “The Silent Killers,” gevier. Dealan Fredericks, die seremoniemeester en akteur, het die geleentheid geopen met die woorde: " 'n Akteur het nie 'n teks as daar nie 'n skrywer is nie. Jy het die skrywer nodig vir die woorde."

Engelbrecht het haar digbundel, wat persoonlike temas soos depressie en angs aanspreek, met die gaste gedeel. 

Sy het verskeie gedigte voorgelees en die stories agter die gedigte verduidelik. “Ek het dit ‘The Silent Killers’ genoem omdat dit stadig maar seker besig was om my van binne dood te maak. Ek het besef dat die wegsteek van my stryd die ‘killers’ net sterker gemaak het. 

Die gewig van geheimhouding en stilte was besig om my te versmoor. 

So, ek het 'n keuse gemaak: ek het begin praat, my storie begin deel deur te skryf en hulp gesoek. Dit was nie maklik nie, maar dit was bevrydend,” het sy verduidelik.

Die middag was gesellig en gaste het die geleentheid geniet met drankies en die unieke atmosfeer van die museum. 

Gaste van alle ouderdomme het deelgeneem aan 'n vraagsessie waar geskenkies gewen kon word. Hulle het ook die kans gehad om met die skrywer te gesels en saam foto’s te neem.

Engelbrecht het haar persoonlike stryd gedeel en verduidelik hoe skryf haar gehelp het om haar smart te verwerk. 

Sy het die gaste bemoedig met die woorde: “God laat nooit pyn sonder 'n doel toe nie. Die duisternis kan hard wees, maar jou stem kan harder wees. Praat uit, reik uit en hou vas aan hoop.”

Sy het ook aangekondig dat sy tans besig is met twee nuwe projekte: 'n digbundel en 'n roman wat hopelik volgende jaar gereed sal wees. 

Vir eers is “The Silent Killers” aanlyn beskikbaar by Mgwritesbooks.